மதுபானங்களை ஹோம் டெலிவரி செய்ய அமேசான் முடிவு

ஆன்லைன் வர்த்தகத்துறையில் முன்னணி நிறுவனமான அமேசான், இந்தியாவில் மதுபானங்களை ஹோம் டெலிவரி செய்வதற்கான அனுமதியை பெற்றுள்ளது. இதனால் அமேசான் நிறுவனம் மதுபானங்களை விரைவில் ஹோம் டெலிவரி செய்ய இருக்கிறது.

தற்சமயம் முதற்கட்டமாக மேற்கு வங்க மாநிலத்தில் மதுபானங்களை வாடிக்கையாளர்கள் வீட்டிற்கே கொண்டு சேர்க்கும் பணிகளை அமேசான் துவங்க உள்ளது. தற்போதைய தகவல்களின் படி இந்தியாவில் அமேசான் நிறுவனம் மதுபான துறையில் களமிறங்கி இருப்பது இதுவே முதல் முறை ஆகும்.

நாட்டின் அதிக மக்கள் தொகை கொண்ட மாநிலங்களில் நான்காவது இடத்தில் இருக்கும் மேற்கு வங்கத்தில் சுமார் 9 கோடி பேர் வசிக்கின்றனர். மதுபானங்களை விநியோகம் செய்வதற்கான அனுமதி பெற்றுள்ளதை தொடர்ந்து அமேசான் நிறுவனம் மேற்கு வங்க மாநில அரசுடன் புரிந்துணர்வு ஒப்பந்தத்தில் கையெழுத்திட அழைப்பு விடுக்கப்பட்டுள்ளது.

கடந்த சில ஆண்டுகளில் அமேசான் போன்ற முன்னணி ஆன்லைன் வர்த்தக நிறுவனங்கள் பல்வேறு பொருட்களை ஆன்லைனில் விற்பனை செய்ய துவங்கி இருக்கின்றன. உலகின் அதிக மக்கள் தொகை கொண்ட இரண்டாவது நாடான இந்தியாவில் ஆன்லைன் ஷாப்பிங் மோகம் தொடர்ந்து அதிகரித்து வருவதே இதற்கு முக்கிய காரணியாக பார்க்கப்படுகிறது.

முன்னதாக ஸ்விக்கி மற்றும் ஜொமாட்டோ போன்ற நிறுவனங்களும் ஆன்லைனில் மதுபானங்களை விற்பனை செய்ய துவங்கிவிட்டன. அந்த வகையில், ஆன்லைனில் மதுபானங்களை விற்பனை செய்வதற்கான அனுமதி பெற்ற புதிய நிறுவனமாக அமேசான் இருக்கிறது.